netflix

Ինչպե՞ս առցանց սկավառակների վարձույթի ընկերությունը դարձավ հոսքային մուլտիմեդիայի խոշորագույն մատակարարը։

Netflix-ն աշխարհի ժամանակակից խոշորագույն մուլտիմեդիա ընկերությունն է եւ համարվում է ֆիլմերի և սերիալների գլխավոր մատակարարը: 2014-ին ընկերության լսարանը հասել է 50 միլիոն օգտատիրոջ նշագծին:

Սկավառակների վարձույթ

Ընկերությունը հիմնադրվել է 1997 թվականին՝ Ռիդ Հասթինգսի և Մարկ Ռանդոլֆի կողմից։ Լեգենդն այն մասին, որ գաղափարը եկել է Ռիդի գլխին, երբ նա տուգանք էր վճարում ժամանակին չվերադարձրած վարձույթով ֆիլմի սկավառակի համար, պաշտոնապես հաստատված չէ հիմնադիրներից և ոչ մեկի կողմից:

Մի անգամ Ռիդն ու Մարկը տեսավարձույթի շուկայում ազատ նիշա նկատեցին՝ կապված առկա սրահների եւ ծառայությունների անհարմարության հետ: Մտածելով այդ մասին՝ Netflix-ի ապագա հիմնադիրները մտադրվեցին ստեղծել ֆիլմեր և հեռուստաշոուներ վարձելու ավելի հարմար մեթոդ: Աշխատանքի մոդելը կառուցվեց այնպես, որ, օգտվելով տեսավարձույթի ծառայություններից, մարդը կարող էր վարձել ֆիլմը, փոխարենը չհասնելով խանութ կամ գրասենյակ՝ ֆիլմի սկավառակը ստանալու համար։ Ծառայությունը հարմար էր նաև նրանով, որ վարձակալության ձևակերպումը շատ հեշտ էր կատարվում՝ փոստի կամ բանկային վճարման տեսքով։ Մեկ շաբաթվա արժեքը $ 4 էր, եւս $2-ը գանձվում էր փոստով ուղարկելու համար: Անազնիվ հաճախորդներից պաշտպանվելու համար Netflix-ը թույլ էր տալիս նոր սկավառակներ վերցնել միայն հիները վերադարձնելուց հետո:

Ձեռնարկատերերը կարողացան Pure Software ծրագրային ապահովման վաճառքից ստացված հասույթի օգնությամբ ապահովել այդպիսի ընկերության գործարկման ֆինանսական կողմը: Հասթինգսը նախագծում ներդրեց մոտ 2,5 մլն դոլար, իսկ Netflix-ի սկզբնական լսարանը ԱՄՆ բնակիչներ էին:

Գրեթե մեկ տարի պահանջվեց, որպեսզի լուծվեն բոլոր անհրաժեշտ ձևականություններն ու անձնակազմի ընտրությունը: Netflix-ը պաշտոնապես սկսեց գործել 1997-ի օգոստոսին: Ընկերության սկզբնական անձնակազմը կազմում էր 30 հոգի, իսկ վարձույթում կար ոչ ավելի, քան 900 սկավառակ։

Netflix-ի առավելություններից մեկն այն էր, որ կայքում անընդհատ հայտնվում էին նորույթների ակնարկներ, թողարկվում էին անոնսներ․ ընդհանուր առմամբ, արվում էր ամեն ինչ հաճախորդներին գրավելու համար: Լսարանը մեծացնելու մեկ այլ մեթոդ դարձավ լավագույն եւ հետաքրքիր տեսանյութերի թողարկումը։ Այսպիսով, ընկերությանը հաջողվեց մեկ շաբաթում իրացնել Բիլլ Քլինթոնի վկայությունների և ցուցմունքների ավելի քան 10 հազար օրինակ՝ Լեվինսկիի աղմկահարույց գործով, որը հանգեցրեց ԱՄՆ նախագահի իմպիչմենտի փորձին: Հետագայում թրենդները զգալու ունակությունը Netflix-ին մեկ անգամ չէ, որ օգնեց։ 

Ճանապարհի սկզբում ընկերությունը ստիպված եղավ բախվել մի քանի խնդիրների, որոնք կարող էին ոչնչացնել ընկերությանը։ Դրանցից առաջինը՝ սկավառակների անվտանգ եւ ամբողջական առաքումն էր փոստի միջոցով. Բանն այն է, որ փոստը հատուկ մեքենաների միջոցով տեսակավորվում էր, որոնք աշխատում էին մեծ քանակությամբ նամակների հետ, եւ հավանական էր, որ սկավառակները ունենալով սովորական նամակի տեսք, կտեսակավորվեին այդ մեքենաներում և հնարավոր է, որ վնասվեին: Հետեւաբար, Netflix-ը պետք է մտածեր, թե ինչպես պահպանել իր արտադրանքի անվտանգությունն ու ամբողջականությունը։ Սկսվեց եզակի ծրարի մշակումը. ստեղծվեցին տարբեր նյութերից պատրաստված շուրջ 150 տարբերակ: Որպես վերջնարդյունք՝ ընտրվեց հաստ թղթից պատրաստված ծրարի տարբերակ` որն արդյունավետորեն պաշտպանում էր սկավառակը վնասվելուց:

Բացի այդ, շուկայում գոյություն ունեին մի քանի խոշոր մրցակիցներ, որոնց մեջ առանձնաում էր «Blockbuster»-ների ցանցը՝ տարեկան մինչև 5 միլիարդ դոլար եկամուտներով: Նրանք դեռևս չէին աշխատում առցանց, բայց ամեն վայրկյան կարող էին սկսել եւ հեշտությամբ փոշիացնել սկսնակ բիզնեսին։ Հասթինգսը հասկանում էր, որ նման պայմաններում պետք է արագ գործել։ Որպեսզի կայքում լսարան ներգրավեին, հիմնադիրները ձեռնամուխ եղան օգտատերերի համար հատուկ ակցիաների ստեղծմանը: Աշխատանքի առաջին տարում հաճախորդների միջև խաղարկվեց ուղևորություն դեպի Լոս Անջելես, և նրանք, ովքեր վարձակալեցին ավելի քան երկու սկավառակ, տրվեց 30% զեղչ: Իր գոյության առաջին տարում նույն կերպ լուծվեց ընկերության մեկ այլ խնդիր՝ DVD օգտագործողների ցածր տոկոսը։ Արդյունքում ընկերությունը գնաց իր սիրված ճանապարհով` բոնուսներ հաճախորդին: Դրա համար պայմանագիր կնքվեց Ճապոնական Toshiba ընկերության հետ։ ԱՄՆ տարծքում Toshiba ընկերության DVD գնելու դեպքում՝ յուրաքանչյուր գնորդ ստանում էր երեք սկավառակի անվճար վարձույթ: Այսպիսով, ընկերությունը ավելացրեց ոչ միայն DVD օգտագործողների թիվը, այլև սեփական լսարանը: 1999 թվականին Netflix-ի աշխատակազմը հասավ մինչև 110 մարդ, իսկ վարձույթով սկավառակների քան 250 հազար։ Դա հիմնականում պայմանավորված է սկավառակների առցանց վաճառքի ամբողջական մերժմամբ, որտեղ ընկերությունը ստիպված կլիներ մրցակցել Amazon-ի եւ այլ հսկաների հետ: Netflix-ը մնաց սկավառակների առցանց վարձույթի շուկայում, ինչը, ղեկավարության կարծիքով, շատ ավելի խոստումնալից էր: Նույն թվականին փոփոխության ենթարկեցին ծառայության աշխատանքի սխեման։ Մեկշաբաթյա վարձակալության փոխարեն ներդրվեց ամսական վարձակալության տարբերակը, ընդ որում ընկերությունը շարունակեց իր հաճախորդներին տարբեր ակցիաներ առաջարկել։ Յուրաքանչյուր ոք կարող էր ամսվա ընթացքում 4 DVD սկավառակ վերցնել ընդամենը $ 15,95-ով: Հաշվի առնելով բովանդակության ճիշտ ընտրությունը, 1999 թվականին մեկ օրվա ընթացքում Netflix-ը ստացավ ավելի քան 100 հազար պատվեր:

Բացի այդ, ընկերությունը կարողացավ Arnault Group-ից 30 միլիոն դոլար ներդրումներ ներգրավել: Ստացված միջոցները օգտագործվեցին ծառայությունը գովազդելու համար, ինչը, վերլուծաբանների կարծիքով, կարևոր քայլ էր ոլորտում ընկերության հետագա աճի և գերիշխանության համար:

2000 թվականի սկզբին Netflix-ը ներկայացրեց ֆիլմերի առաջարկության Cinematch համակարգը։ Համակարգը վերլուծում էր կայքից օգտվողների նախասիրությունները և նրանց հետաքրքրող ֆիլմեր էր խորհուրդ տալիս՝ էապես հեշտացնելով ընտրությունը։ Նույն թվականին համաձայնություններ կնքվեցին Warner Home Video-ի և Columbia Tristar-ի հետ։ Գործարքի համաձայն՝ Netflix-ը առաջնային իրավունք ստացավ իր մոտ տեղադրելու կինոընկերությունների արտադրանքը՝ ստացված շահույթի որոշակի մասնաբաժնի դիմաց։ Նույն 2000 թվականին ստեղծվեց հատուկ ծառայություն, որի աշխատակիցները ստուգում էին սկավառակի վրա քերծվածքների առկայությունը՝ դիտելով վարձույթից վերադարձված ֆիլմերի սկավառակները։ Այսպիսով, ընկերության ծառայությունները միշտ պետք է մնային բարձր մակարդակի վրա:

Աստիճանաբար թափ էր հավաքում նաև ծառայության նոր տարբերակը՝ առցանց բաժանորդագրությունը, որը մշակել էին 1999 թվականին։ Ի սկզբանե դրա արժեքը 4 սկավառակների համար կազմում էր ամսական $ 19,95։ Ընդ որում, չկար ոչ մի ժամանակային սահմանափակում, օգտագործողը կարող էր վարձակալել սկավառակը անգամ մեկ տարի ժամկետով: Նոր հաճախորդների համար ստեղծվեց 6-օրյա փորձնական բաժանորդագրություն, որն ըստ Հասթինգսի, միանգամայն բավարար էր ծառայության առավելությունները գնահատելու համար:

Նույնիսկ 2001 թվականի սեպտեմբերի 11-ի իրադարձությունները չխանգարեցին արագ աճող ընկերությանը: Տեղի ունեցածից ցնցված ամերիկյան հասարակությունը նախընտրեց ժամանակն անցկացնել տանը, ուստի՝ օգտագործողների թիվը սկսեց սրընթաց աճել ։

Միևնույն ժամանակ, ընկերությունը լրջորեն պայքարի մեջ մտավ իր հիմնական մրցակիցի` Blockbuster-ի հետ: Բազմաթիվ առումներով Netflix-ի հաջողությունը սկավառակների վարձույթի ոլորտում կապված է այն բանի հետ, որ այն առաջիններից մեկն էր, ով սկսեց կիրառել long tail բիզնես մոդելը՝ լսարանին առաջարկելով բովանդակության ընտրության ավելի լայն հնարավորություն՝ միայն ամենաճանաչված արտադրանքները առաջարկելու փոխարեն։ Եվ ըստ այդմ հաճախորդները կարողացան գտնել իրենց դուր եկած ֆիլմերն ու շոուները, անկախ նրանից, թե որքան բացառիկ էին իրենց նախասիրությունները: Հենց դա էլ թույլ տվեց Netflix-ին շրջանցել մրցակիցներին։

Աշխատանքի նոր մեթոդի ներդրման համար՝ ընկերությունը ստիպված եղավ հրաժարվել միայն ԱՄՆ-ի ամենահայտնի ֆիլմերի ցուցադրության վրա հիմնված ստանդարտ մոտեցումից եւ սկսեց ծառայության կայքում առաջարկել և առաջխաղացնել արտասահմանյան ֆիլմեր և շոուներ՝ եվրոպականից սկսած՝ հնդկականով վերջացրած: Ընդ որում, հանդիսատեսի շրջանում հատկապես սիրված էին արտհաուսային ֆիլմերը, որոնց վարձույթն ուղղակիորեն ազդում էր եկամուտների աճի վրա։ Սակայն աճի ավելորդ ձգտումը հանգեցնում է նրան, որ ընկերությունը տարեկան 21 մլն դոլարի վնաս էր կրում՝ 74 մլն դոլար հասույթի պարագայում։

2001-ին Netflix-ի ղեկավարները սկսեցին նկատել, որ նրանց օգտագործողների մեծ մասը Սան Ֆրանցիսկոյի ծովածոցից են։ Այս միտումը նրանց հետաքրքրեց, և իրավիճակը հասկանալու համար՝ ընկերությունը դիմեց իր սիրած մեթոդին`աշխատել լսարանի հետ։ Կայքում հարցում անցկացվեց, որից պարզ  դարձավ, որ գլխավոր խնդիրը առաքման ժամանակն է։ Որպես հետեւանք՝ Հասթինգսը հայտարարեց նոր բաշխիչ կենտրոնների թվի ավելացման մասին, ինչը էապես արագացրեց լսարանի աճի դինամիկան։

Հաջորդ տարին հայտնի դարձավ ի շնորհիվ երկու կարևոր իրադարձության՝  ընկերությունից հեռացավ Մարկ Ռանդոլֆը իսկ Netflix-ը դուրս եկավ IPO: Ռանդոլֆը ընկերությունը լքեց աշնանը՝ բիզնես գործընկերոջ հետ տարաձայնությունների պատճառով։ Մինչ օրս գործարարներից ոչ մեկը չի հայտնել նրա հեռանալու պատճառների մասին։ Հայտնի է միայն, որ Մարկը վաճառել է իր բաժնեմասը և սկսել է ծառայություն մշակել գրքերի առցանց վարձույթի համար:

Ծառայության համբավը և նրա ղեկավարության համարձակ քայլերը ստիպեցին Netflix-ի մրցակիցներին գնահատել շուկայի հեռանկարները և հասկանալ, որ եթե հիմա ոչինչ չձեռնարկեն, ապա «հետո» ուշ կլինի և հնարավոր է, որ այլևս շուկայում չլինեն: Այդ իրավիճակից դրդված՝ իր կոնտենտի համար Blockbuster-ը ներդրեց ճկուն զեղչային համակարգ։ Բացի այդ, շուկայի փոփոխությունները հանգեցրեցին նրան, որ առցանց վարձույթով սկսեց հետաքրքրվել նաև Wal-Mart-ը, որից հետո նմանատիպ ծառայություն գործարկեց՝ առաջարկելով ավելի ցածր գին, քան Հասթինգսի ընկերությունը: Սակայն դա չխանգարեց Netflix-ին հայտարարել ռեկորդային հասույթի մասին, որը գերազանցեց 152 մլն դոլարը։

Հարկ է նշել, որ Wal-Mart-ի հետ կատաղի մրցակցությանը այդպես էլ չստացվեց։ Հսկան՝ գնահատելով նոր շուկա մտնելու դժվարությունները, երկու տարի անց հրաժարվեց իր մտքից եւ իր հաճախորդների բազան վաճառեց Netflix-ին:

2003 թվականի սկզբին ծառայության լսարանը հասավ միլիոնի։ Տարեվերջին ընկերությունը հայտնեց իր առաջին շահույթի մասին՝ 6,5 միլիոն դոլար։ Ամռան վերջին Netflix-ն արդեն ուներ ավելի քան 15 հազար անվանում սկավառակ, ինչը նրան դարձնում էր ԱՄՆ-ում թվային բովանդակության առցանց վարձույթի ամենախոշոր նախագիծը (մրցակից Blockbuster-ը մոտ 3000 անվանում ուներ)։

Հետագա տարիներին ծառայության լսարանի աճը շարունակվեց՝ 2005 թվականին հասնելով 4,2 մլն մարդու։ Ընկերությունը տարածման ռեկորդ սահմանց, հաջողելով օրական մշակել մոտ մեկ միլիոն օգտատիրոջ հայտ: Մամուլում Netflix-ին սկսեցին անվանել ամենաարագ զարգացող ընկերություններից մեկը:

2005 թվականին Blockbuster-ը լրջորեն պայքարի մեջ մտավ իր մրցակցի հետ։ Netflix-ի մրցակիցը վերջապես գործարկեց է իր առցանց վարձույթի ծառայությունը՝ դրանից առաջ զգալիորեն ընդլայնելով սեփական տեսականին՝ մինչեւ 25 հազար անուն ֆիլմեր եւ շոուներ: Ծառայություններն առաջարկվում էին ավելի ցածր գներով։ Արդյունքում Հասթինգսի ընկերության բաժնետոմսերի արժեքը սկսեց նվազել։

Այնուամենայնիվ, Netflix-ը պատասխանելու բան ուներ: Շուտով ընկերությունը նույնպես իջեցրեց ծառայությունների արժեքը՝ հավասարվելով մրցակցին, ավելին՝ մեծացնելով նաև տեսականին։ Ի պատասխան՝ Blockbuster-ը ներկայացրեց Total Access համակարգը՝ որը թույլ էր տալիս իրար միավորել առցանց ծառայություններն ու իրական խանութները։ Blockbuster-ի հաճախորդները կարող էին անվճար սկավառակներ ընտրել, այնուհետև փոստի միջոցով դրանք փոխել գումարի հետ։

Ի սկզբանե կարող է թվալ, որ պլանն աշխատել էր եւ Netflix-ի հաճախորդների մի մասն անցել էին մրցակցին, բայց այս ազդեցությունը ժամանակավոր էր: Ավարտել սկսածը՝ Blockbuster-ին խանգարեցին չափազանց մեծ թվով մանրածախ առեւտրականները, քանի որ նրանցից ոչ բոլորը համաձայնվեցին մասնակցել ակցիային։ Ավելին, անվճար սկավառակների բաժանման պատճառով ընկերությունը սկսեց գումարներ կորցնել։ Իսկ հեղինակային իրավունքի սեփականատերերի հայցերը վերջնականապես ոչնչացրեցին հսկայի հույսերը:

Ի վերջո, Blockbuster-ը գնաց պարզ քայլերի, բարձրացրեց ծառայության արժեքը և ամսական փոխանակման  սահմանափակումները մցրեց՝ այս կերպ հույս ունենալով շտկել ֆինանսական իրավիճակը: Ոչինչ չստացվեց, և ավելին՝ լսարանը սկսեց անցնել Netflix-ին: Հսկան ինքն իրեն ոչնչացրեց: Արդյունքում, արդեն 2010-ին, Blockbuster-ը իրեն սնանկ ճանաչեց:

Ձեւաչափի փոփոխություն: Հոսքային տեսանյութեր

2007 թվականին Netflix-ը սկսեց հոսքային տեսանյութեր տարածել, ինչն ընկերությանը դարձրեց աշխարհի խոշորագույն ընկերություններից մեկը։ Նոր մոդելի անցումը պայմանավորված էր նրանով, որ Հասթինգսը հասկանում էր, որ DVD-ն բովանդակության տարածման միակ միջոցը չէ, բացի այդ, ամպային ծառայությունների հայտնվելուց հետո, տեղեկատվության մեծ մասը պահվում էր ինտերնետում: Այստեղից նոր նիշա առաջացավ, որը կարող էր ընկերությունը լրացնել։

Նույն տարում ծառայության հաճախորդներին առաջարկվեց նոր ծառայության թեստային մոդել, որում կար շուրջ 1000 ֆիլմ եւ սերիալ: Հոսքային մուլտիմեդիայի ոլորտում՝ ծառայության աշխատանքի առաջին մոդելն իր մեջ ներառում էր վճարումները կատարել դիտման ժամանակ։ Այնուհետև տեսանյութերի համար բաժանորդագրությունն առաջարկվեց 6-48 ժամով։ Ամենատարածված տարբերակը դարձավ 18 ժամանոց բաժանորդագրությունը, որի դիմաց հաճախորդները վճարում էին ամսական $ 17,99։ Այնուհետեւ ներդրվեց ամսական ստանդարտ սակագին, որի արժեքը Netflix-ի բաժանորդների համար կազմեց 8 դոլար:

2013-ին ներդրվեց ընտանեկան բաժանորդագրության ծառայություն, ըստ որի ընտանիքի յուրաքանչյուր անդամ (եթե այնտեղ 4-ից ավելի մարդ չկա) կարող էր ընտրել առանձին ֆիլմ դիտելու հնարավորություն` 11,99 դոլարով: 2014 թվականին բաժանորդագրության արժեքը եվրոպական երկրների համար աճեց €8,99-ից €9,99։ Ընդ որում, հիմնական շահույթը՝ ընկերությունը շարունակում էր ստանալ սկավառակների վարձույթից, որը դարձել էր ընկերության հենարանը մինչեւ աշխատանքի նոր մոդելի վերջնական ներդրումը:

Նոր տարբերակի ներդրման հետ կապված հիմնական մտահոգությունը՝ կայքի եզակի բովանդակության գրավչությունն էր, որով հնարավոր կլիներ շատ օգտվողներ ներգրավել։ Դրա համար դեռևս 2008 թվականին ընկերությունը պայմանագիր կնքեց Starz Entertainment ստուդիայի հետ, որը Netflix-ին ավելի քան 2000 ֆիլմ ու հեռուստաշոուներ տրամադրեց։ Դա միայն առաջին քայլն էր։ 2010 թվականին ընկերությունը համաձայնության եկավ այնպիսի խոշորագույն կինոստուդիաների հետ, ինչպիսիք են Paramount Pictures-ը, Metro-Goldwyn-Mayer-ը, Lionsgate-ը, Disney-ը, MGM-ը, GBS-ը եւ շատ ուրիշներ:

Միևնույն ժամանակ, ավելացավ այն պլատֆորմների քանակը, որոնց միջոցով հնարավոր եղավ օգտվել ընկերության ծառայություններից: 2009 թվականին այդ շարքին դասվեցին Xbox-ը, PS3-ը և Blu-ray-ը։ Բացի այդ, ընկերության ֆիլմերը դիտելու համար վաճառքի հանվեց Roku անվանումով հատուկ գաջեթը։ Միեւնույն ժամանակ, Netflix-ի հոսքային տեսանյութերի բաժանորդների թիվը հասավ 3 միլիոնի:

2010-ին արդեն ավելի շատ սարքեր կային, որոնք աջակցում էին ընկերության առցանց դիտման տարբերակը։ Այդ պահից նրա հաճախորդները կարող էին դառնալ Apple-ի (այդ թվում ՝ Apple TV), ինչպես նաեւ Nintendo Wii-ի արտադրանքի օգտատերերը: Մինչև տարեվերջ ընկերության հոսքային վիդեո լսարանը աճեց մինչև 10 միլիոն: Այդ տարի մամուլում տեղեկություններ հայտնվեցին, որ այդ ձեռքբերումները վկայում են սկավառակների վարձույթից հրաժարվելու և  առցանց հեռարձակման ամբողջական անցման մասին։

Զարգացումը վերջին տասնամյակում

2010 թվականին աստիճանաբար սկսվեց միջազգային ինտեգրումը։ Ծառայության նպատակներն էին Արևմտյան Եվրոպայի և Լատինական Ամերիկայի երկրները, որտեղ 2014 թվականին հաջողվեց ամրապնդվել: Մեկ տարի անց Netflix-ը հասանելի դարձավ Նոր Զելանդիայի, Ավստրալիայի և Ճապոնիայի օգտատերերի համար։

2011-ին Netflix-ը շեշտը դրեց կայքում եզակի բովանդակության ավելացման վրա, ինչը անխուսափելիորեն հանգեցրեց լսարանի արագ աճին: Նման բովանդակության գլխավոր աղբյուրը դարձավ սեփական սերիալների արտադրությունը. սկսվեց “Թղթե տնակ” սերիալի նկարահանումները, որը նորամուտը նշեց 2013 թվականին: Բացի այդ, Fox-ի հետ բացառիկ պայմանագրեր կնքվեցին “Դանդաղ զարգացում” կատակերգական սերիալի չորրորդ եթերաշրջանի ցուցադրման համար: Տարվա արդյունքներով ընկերության հասույթը կազմեց 3,2 մլրդ դոլար։

Նույն թվականին սկավառակների վարձակալության ծառայությունը առանձնացվեց որպես դուստր ընկերության և անվանվեց Qwikster։

2013 թվականին պայմանավորվածություն ձեռք բերվեց Netflix-ի եւ Marvel Television-ի միջեւ, չորս հերոսների՝ Daredevil-ի, Ջեսիկա Ջոնսի, Երկաթե Բռունցքի եւ Լյուկ Քեյջի մասին սերիալների արտադրության վերաբերյալ:  Marvel-ի կինեմատոգրաֆիական տիեզերքի հեռուստասերիալները, անշուշտ, պետք է ավելացնեին ծառայության լսարանը: Բացի այդ, Disney-ի հետ պայմանավորվածություն ձեռք բերվեց հեռարձակել The Clone Wars անիմացիոն շարքի վեցերորդ սեզոնը:

Նույն թվականին ընկերությանը “Թղթե տնակ” սերիալը առաջադրվեց Emmy Awards-ի 9 անվանակարգերում։ Ճիշտ է, դրանցից ոչ մեկում հաղթել չհաջողվեց։ Այդ տարի Netflix-ի զուտ շահույթը հասավ 112 մլն դոլարի՝ 33 մլն լսարանով։

2014 թվականին ծառայության օգտատերերի թիվը գերազանցեց 50 միլիոնը, իսկ զուտ շահույթը հասավ 266 միլիոն դոլորի: Այդ տարվա սեպտեմբերին հայտարարվեց Netflix-ի առաջին սեփական ֆիլմի՝  “Crouching Tiger, Hidden Dragon 2”-ի  պատրաստման մասին: Նույն թվականին սկսվեցին Պաբլո Էսկոբարի մասին կենսագրական սերիալի նկարահանումները՝ Narcos-ը։  Այսպիսով, ընկերությունը շարունակեց զարգացնել յուրօրինակ բովանդակության անկախ արտադրության ուղղությունը:

2015 թվականին լսարանի աճի տեմպը նվազեց. երրորդ եռամսյակում ավելացավ ընդամենը 3,6 մլն օգտատեր: Ծառայության բաժանորդների ընդհանուր թիվը հասցնելով 66 միլիոնի։ Աճի փոքր դինամիկան չազդեց շուկայում ընկերության դիրքի վրա, բայց առաջացրեց վերլուծաբանների բացասական արձագանքը, որոնք այլ կերպ էին կանխատեսում ծառայության զարգացումը: Միևնույն ժամանակ, Netflix-ը շարունակում է իր միջազգային ընդլայնումը և պատրաստվում է շուտով սկսել աշխատանքը Թայվանի, Կորեայի և Սինգապուրի շուկաներում:

Netflix-ի բաժնետոմսերը վերջին 10 տարվա ընթացքում ամենաեկամտաբերն են եղել S&P 500 ընկերությունների շրջանում. դրանց արժեքն աճել է 4181%-ով: Այս ցուցանիշի ֆոնին, S&P 500 ինդեքսն աճել է 189%-ով։ Համեմատության համար, 2010 թվականին 1 միլիոն դոլարով գնված Netflix-ի բաժնետոմսերի համար այսօր կարելի է ստանալ մոտ 43 միլիոն դոլար: 2010-ի սկզբին Netflix-ն ունեցել է ավելի քան 12 միլիոն վճարովի բաժանորդ, իսկ 2019 թվականի երրորդ եռամսյակում այս թիվը կազմել է մոտ 158,3 մլն բաժանորդ։ Nasdaq-ում Ընկերության կապիտալիզացիան կազմում է 145,78 մլրդ դոլար:

ОСТАВЬТЕ ОТВЕТ

Please enter your comment!
Please enter your name here